काठमाडौं । सिटिजन्स बैंक इन्टरनेशनल लिमिटेडले ल्याएको माई–आस्बा सुविधाले ग्राहककाे आईपीओ आवेदन प्रक्रियालाई थप सहज बनाएको छ । मोबाइल बैंकिङ एपबाटै आईपीओ अप्लाई गर्न मिल्नेगरी बैंकले गत वर्ष माई–आस्बा फिचर सञ्चालनमा ल्याएको थियो ।

यो सुविधाले ग्राहकहरुको सेयर आवेदन प्रक्रियालाई सहज बनाउनुका साथै मेरोसेयरको आइडी/पासवर्ड र सीआरएन नम्बर सम्झिनुरहनुपर्ने झन्झटको पनि अन्त्य गरेको बैंककी डिम्याट/आस्बा प्रमुख रोजिना तिवारी बताउँछिन् । ‘राम्रो प्रतिकृया पाइरहेका छौं, आईपीओ भर्नेदेखि आईपीओ परे/नपरे लगायतका सबै अपडेट मोबाइल बैंकिङ एपबाटै हेर्न मिल्ने भएपछि ग्राहकले निकै रुचाउनुभएको छ’ उनले भनिन् ।

याे सुविधा ल्याउने पहिलो बैंक नै सिटिजन्स बैंक रहेको उनले बताइन् ।

ग्राहकले आईपीओ भर्ने क्रममा विभिन्न गल्ती गर्दा आवेदन बिग्रने र रद्द हुने गरेकाे प्रमुख तिवारीले बताइन् । ‘धेरैजसो ग्राहकले १० कित्ता भर्न खोज्दा १०० कित्ता भर्ने, सीआरएन नम्बर मिस्टेक राख्ने, एक कम्पनीको आईपीओ भर्न लाग्दा अर्कैमा भर्ने, जस्ता त्रुटि मूख्यरुपमा गर्नुहुन्छ’ उनले भनिन् ।

सिटिजन्सकाे माई–आस्बाबाट सेयर अप्लाई गर्दा प्रक्रिया पुगे, नपुगेको पनि सहजै जानकारी लिन सकिने भएकाले आवेदन रिजेक्ट हुने जोखिम कम रहेको उनी बताउँछिन् ।

माई–आस्बामा जोडिने प्रकृयाबारे जानकारी दिँदै प्रमुख तिवारीले भनिन्, ‘यसका लागि सिटिजन्स बैंकको मोबाइल बैंकिङ खोलेपछि त्यहाँ ‘माईआस्बा’ अप्सन हुन्छ, त्यसमा क्लिक गर्नुपर्छ । त्यसपछि पहिलोपल्ट खोलेका ग्राहकले डिम्याट नम्बर राख्नुपर्छ, अनि लिंक गर्न मिल्छ, जसमा सीआरएन नम्बर पनि सिधै लिंक हुन्छ । तर यदि सीआरएन नम्बर लिएकै छैन भनेपनि समस्या हुँदैन, डिम्याट नम्बर राखेपछि सिआरएन नम्बर आफै अपियर हुन्छ ।’

अर्कोपटकदेखि भने सिधै आईपीओ भर्न मिल्ने उनले बताइन् ।

सीआरएन नम्बर लिन ग्राहकले बैंक धाउन नपर्ने गरी घरबाटै लिन मिल्ने सुविधा पनि रहेको उनले जानकारी दिइन् । ‘हामीले कस्टमरलाई जतिसक्दो सहज रुपमा डिम्याट, आइपिओसँगै विभिन्न बैंकिङ सेवाहरु प्रदान गर्ने प्रयास गरिरहेका छौं’, उनले भनिन् ।

ग्राहकहरुको सहजताका लागि अनलाईनबाटै डिम्याट अकाउन्ट खोल्ने सुविधा दिनेबारे पनि अध्ययन भइरहेको उनले बताइन् ।