काठमाडौं । मंगलबार प्रहरीले दक्षिणकालीको मन्दिर नजिकै रहेको पार्किङ सँगैको शौचालयमा एक महिलाको शव फेला परेको थियो । उक्त शव पशुपंछीको आवाज निकालेर युट्युबमा भाइरल बनेकी महिला सन्तोषी सुब्बाको रहेको महानगरीय अपराध महाशाखाले जनाएको छ ।

प्रहरीले मंगलबार दक्षिणकालीको शौचालयबाट महिलाको शव बरामद गरेको थियो । प्रहरीका अनुसार टाउकोमा र अनुहार गम्भिर चोटपटक लागेको थियो तर अनुसन्धान गर्दै जाँदा दक्षिणकालीमा भेटिएको शव सामाजिक सञ्जालमा विभिन्न आवाज निकालेर चर्चामा आएकी सुब्बाको भएको पुष्टि भएको हो ।

मृत सुब्बा कालोपुलस्थित टहरामा बस्दै आएका धनबहादुर तामाङले करिब १८ वर्षदेखि धर्मछोरी बनाएर राखेका थिए । महानगरीय अपराध महाशाखाका अनुसार करिब १८ वर्ष पहिलेदेखि सन्तोषीलाई धर्म छोरी बनाएर पालेका धनबहादुर तामाङले सन्तोषी आइतबारदेखि नै परिवारको सम्पर्कमा नरहेको बताएका थिए ।

सन्तोषी सुब्बाको शव मंगलबार बिहान दक्षिणकाली बसपार्क नजिकैको शौचालयमा भेटिएको थियो । उनको अनुहारमा ढुङ्गाले हानेर हत्या गरिएको र शवसमेत चिन्न नसक्ने अवस्थामा प्रहरीले शव भेटिएको थियो ।

चिनजानकै व्यक्तिबाट हत्या हुन सक्ने आशंका
जंगलको छेउमा रहेको सुनसान स्थलमा शव फेला परेका कारण चिनजानकै व्यक्तिले उनलाई त्यहाँ पुर्याएर हत्या गरिएको हुनसक्ने प्रहरीले अनुमान गरेको छ । उनलाई कसले दक्षिणकाली पुर्यायो किन पुर्यायो ? भन्ने विषयमा थप अनुसन्धानका लागि प्रहरीले उनको चिनजानका व्यक्ति, धेरै कुराकानी हुने व्यक्ति आदिको बारेमा जानकारी लिइरहेको र केही दिनमै हत्याराको पहिचान खुल्ने विश्वास दर्शाएको छ ।

उनले लगाएको कपडा र घटनास्थलमा फेला पारिएको केही सामानको आधारमा उनको शव पहिचान भएको हो । उनको शव पोष्टमार्टमका लागि त्रिवि शिक्षण अस्पतालमा पठाइएको छ ।