काठमाडौँ । कर्णाली प्रदेशमा मुख्यमन्त्री महेन्द्रबहादुर शाहीलाई कालीकोटमा कालो झण्डा देखाइएको छ । मुख्यमन्त्री शाहीलाई कालो झण्डा देखाएको अभियोगमा प्रहरीले ३ जनालाई नियन्त्रणमा लिएको छ ।

स्थानीय तहको नीति तथा कार्यक्रम र आगामी आर्थिक वर्षको बजेट कार्यक्रम उद्घाटन गर्न कालीकोट पुगेका मुख्यमन्त्री शाहीलाई नेकपा (एमाले) अनेरास्ववियुका कार्यकर्ताले कालो झण्डा देखाएका हुन् ।

मुख्यमन्त्रीलाई झण्डा देखाएको भन्दै प्रहरीले धर्म शाही, ज्ञानेन्द्र शाही र मिनराज न्यौपानेलाई नियन्त्रणमा लिईएको जिल्ला प्रहरी कार्यालयका प्रवक्ता प्रहरी निरिक्षक भुपेन्द्र शाहीले मेरोन्युजलाई बताए । उनले भने, ‘हामीले उहाँहरुलाई नियन्त्रणमा लिएका थियौ उहाहरुलाई छोडी सकेका छौ ।

बिहीबार मुख्यमन्त्री शाही र भूमि, कृषि तथा सहकारीमन्त्री कालीकोटको सदरमुकाम मान्मबाट नरहरिनाथ गाउँपालिकाको नीति तथा कार्यक्रम उद्घाटन गर्न जाँदा कालो झण्डा देखाइएको हो ।