काठमाडौं । प्रतिनिधिसभा विघटन बिरुद्ध परेको रिटमा संवैधानिक इजलासमा सुनुवाई सुरु भएको छ । मंगलबारको सुनुवाईमा सरकार पक्षबाट नायव महान्यायाधिवक्ता पदम प्रसाद पाण्डेयले बहस सुरु गरेका छन् । जारी सुनुवाईमा उनलाई २ घण्टा समय छुट्याइएको छ ।

सोमबार सरकारको तर्फबाट महान्यायाधिवक्ता रमेश बडालले बहस गरेका थिए । उनले ३ घण्टा २० मिनेट बहस गरेका हुन् । विपक्षी गठबन्धन वा रिट निवेदकको तर्फबाट बहस सकिएको छ ।

कांग्रेस सभापति शेर बहादुर देउवालाई प्रधानमन्त्री बनाउन र प्रतिनिधि सभाको पुनस्थापना गर्न माग सहित १ सय ४६ जना सांसदले सर्वोच्च अदालतमा रिट निवेदन दर्ता गरेका थिए ।

प्रतिनिधिसभा विघटन मुद्दाको सुनुवाई गर्न संवैधानिक इजलासमा प्रधान न्यायाधीश चोलेन्द्र शम्शेर जबरा, न्यायाधीश दीपक कुमार कार्की, मीरा खड्का, ईश्वरप्रसाद खतिवडा र डा। आनन्दमोहन भट्टराई रहेका छन् ।