काठमाडौँ । यसअघि नेकपा एमालेको केन्द्रीय कमिटीको कुनै बैठकमा सहभागी नभएका तीन नेता सहभागी भएका छन् । आज प्रधानमन्त्रीको सरकारी निवास बालुवाटारमा सम्पन्न बैठकमा पार्टी उपाध्यक्ष बामदेव गौतम, नेता हरि पराजुली र गणेश पहाडी सहभागी भएका हुन् ।

एमाले र नेकपा माओवादी केन्द्र मिलेर बनेको नेकपा अनौपचारिक रुपमा विभाजनपछि पार्टी एकताको अभियानमा लागेका गौतम बैठकमा सहभागी भएका हुन् । त्यस्तै, उनी निकट नेता पराजुली र पार्टी सचिव योगश भट्टराई निकट मानिने पहाडी बैठकमा सहभागी थिए ।

पहाडी यसअघि प्रधानमन्त्री केपी शर्मा ओलीले विस्तार गरेको मन्त्रिपरिषदका मन्त्री हुन् । सर्वोच्च अदालतले उनीहरूको मन्त्रीपद बदर गरिदिएको थियो । ओलीले ९ औँ महाधिवेशबाट निर्वाचित कमिटीलाई भंग गरी १० औँ महाधिवेशन आयोजक कमिटी बनाएका थिए । त्यसपछि एमालेमा विवाद हुँदै आएको थियो । गौतम योबीचमा बसेका एमालेका कुनै बैठकमा सहभागी थिएनन् ।

बुधबार बसेको १० औँ महाधिवेशन आयोजक कमिटीको बैठकमा गौतम सहभागी थिएनन् । आयोजक कमिटीलाई केन्द्रीय कमिटीमा रुपान्तरण गरेपछि अथवा पार्टीलाई २ जेठ २०७५ को अवस्थामा फर्काएपछि गौतम पहिलोपटक बैठकमा सहभागी भएका हुन् । उनी निकटका अन्य नेता पनि बैठकमा सहभागी भएका छन् ।

तर, पार्टीका वरिष्ठ नेता माधव नेपाल पक्षका नेता बैठकमा सहभागी भएनन् । ओली पक्षले एकतर्फी बैठक बोलाएको भन्दै नेपाल पक्ष बैठकमा सहभागी नभएका हुन् । बिहीबार बसेको नेपाल पक्षको स्थायी कमिटी बैठकले आज बस्ने केन्द्रीय कमिटीको बैठकमा नजाने सर्वसम्मत निर्णय गरेको थियो ।

सर्वोच्च अदालतले १० औँ महाधिवेशन आयोजक कमिटीलाई मान्यता नदिएपछि र नेपाल पक्षको माग सम्बोधन गर्ने भन्दै ओलीले आयोजक कमिटीलाई केन्द्रीय कमिटीमा रुपानतरण गरी केन्द्रीय कमिटीको बैठक बोलाएका थिए । ओली स्थायी कमिटी र केन्द्रीय कमिटीमा माओवादी खेमाका नेता र एमालेका केही नेतालाई मनोनित गरेपछि गत फागुन २८ को कमिटी भएको भन्दै नेपाल पक्ष बैठकमा नगएको बुझिएको छ ।

ओली पक्ष र नेपाल पक्षका दोस्रो तहका नेता निरन्तर छलफलमा रहेका थिए । नेपाल पक्षका नेताले ओलीलाई भेटेर आजको केन्द्रीय कमिटी बैठक स्थगित गर्न आग्रह गरेका थिए ।