काठमाडौँ । विद्यार्थीलाई उपलब्ध गराएको खाजा खर्चसहित रकम हिनामिना गरेको अभियोगमा प्रधानाध्यापक दिनेश कुमार विश्वकर्मा नियन्त्रणमा परेका छन् । कपिलवस्तुको साविक भिल्मी गा.वि.स. वडा नं. ४ स्थित श्री सरस्वती आधारभूत विद्यालयका प्रधानाध्यापक विश्वकर्मालाई अख्तियार दुरुपयोग अनुसन्धान आयोगको टोलीले नियन्त्रणमा लिएको हो ।

सरकारले विद्यार्थीका लागि दिइएको दिवा खाजा खर्च, छात्रवृति, पाठ्य पुस्तकलगायतमा आएको रकम दुरुपयोग गरेको भन्ने उजुरी परेपछि आयोगले अनुसन्धान सुरु गरेको थियो । अनुसन्धानका क्रममा आर्थिक वर्ष २०६८–०६९ देखि २०७२–०७३ सम्म विद्यार्थीका लागि निकासा गरिएको खर्च विश्वकर्मा र तत्कालीन विद्यालय व्यवस्थापन समितिका अध्यक्ष शकिल मियाँले हिनामिना गरेको देखिएको आयोगले जनाएको हो ।

उनीहरूले ३ लाख ७१ हजार ७०१ रुपैयाँ हिनामिना गरेको आयोगका प्रवक्ता नारायण प्रसाद रिसालले जानकारी दिए । यस्तै प्रधानाध्यापक विश्वकर्मा र विद्यालय व्यवस्थापन समितिका तत्कालीन अध्यक्ष नरेन्द्र कुर्मीले मिलेर २२ हजार १४९ रुपैयाँ हिनामिना गरेको देखिएको छ ।

आयोगले प्रधानाध्यापक विश्वकर्मालाई ३ लाख ९३ हजार ७५० रुपैयाँ बिगोसहित कारबाही माग गरेको छ । यस्तै, विद्यालय व्यवस्थापन समितिका तत्कालीन अध्यक्ष मियाँलाई ३ लाख ७१ हजार ७०१ रुपैयाँ र कुर्मीलाई २२ हजार १४९ रुपैयाँ बिगो माग दाबी गरी कानुनी प्रक्रिया अघि बढाइएको छ ।