काठमाडौँ । जनता समाजवादी पार्टी (जसपा)बीच एकता खारेज गर्न माग गर्दै सर्वोच्च अदालतमा रिट दायर भएको छ । समाजवादी पार्टी र राष्ट्रिय जनता पार्टीबीच एकता भई बनेको जसपा खारेज गर्न माग गर्दै अदालतमा रिट परेको हो ।

तत्कालीन राष्ट्रिय जनता पार्टीका उपाध्यक्ष राजकुमार थापाले पार्टी एकतादेखि त्रुटिपूर्ण, कपटपूर्ण र मौजुदा संविधान ऐन, कानुनविपरीत भन्दै उक्त एकता खारेज गर्न माग गरेका हुन् ।

रिटमा मुद्दा टुंगो नलाग्दासम्म जसपाको राजनीतिक क्रियाकलाप, सदस्य हेरफेर, कार्य विभाजनलगायतलाई यथास्थितिमा राख्न माग गरेको छ ।

निर्वाचन आयोगमा २०७७ असार ९ गते जसपा दर्ता हुँदा राष्ट्रिय जनता पार्टीको प्रतिनिधित्व नगराइएको, राष्ट्रिय जनता पार्टी नेपालसँग एकीकरण हुँदा भएको सम्झौता बमोजिम केन्द्रीय कार्यसमितिमा जनशक्ति पार्टीको प्रतिनिधित्व नभएको रिटमा उल्लेख गरिएको छ ।