काठमाडौँ । प्रधानमन्त्री केपी शर्मा ओलीले प्रतिनिधिसभा अगाडि बढ्ने विषयमा शंका गरेका छन् । पदबाट राजीनामा दिने तयारी हुँदै गर्दा देशबासीको नाममा सम्बोधन गर्दै उनले यस्तो शंका गरेका हुन् ।

यस्तै, उनले आगामी सरकार र निर्वाचनको बारेमा समेत शंका गरेका छन् । उनले देश गम्भीर दिशातर्फ जान थालेको भन्दै लोकतान्त्रिक प्रणाली कमजोर भएको बताए ।

आदेश तथा परमादेशमार्फत सरकारबाट सरकारबाट हट्नु परे पनि सधै देश र जनतालाई शिरमा राखेर अगाडि बढ्ने बताए । जनताको बीचमा जान आँट नभएका विपक्षी पक्षबाट आफूलाई हटाएको बताए ।

‘सम्मानित अदालतबाट प्रधानमन्त्री हटाइयो, प्रधानमन्त्री बनाइयो,’ ओलीले भने, ‘यसका लागि अवैध गठबन्धन बनाउन पुग्यो ।’

प्रधानमन्त्री ओलीले एमालेका नेता माधव नेपाललाई लक्षित गर्दै आफ्नो पार्टीको सरकार ढाल्ने र अर्को पार्टीको प्रधानमन्त्री बनाउन गएको आरोप लगाए । ‘आफ्नो खेलाडीको खुट्टामा बल दिनु पर्नेमा विपक्षीको खुट्टामा बल दिन्छ, आफूले गोल रोक्नु पर्नेमा गोल गरिदिन्छ,’ प्रधानमन्त्री ओलीले भने ।

विपक्षी गठबन्धनसँग सझेदारी गरी आफूलाई हटाउन लागेको भन्दै ओलीले नेता नेपालप्रति आलोचना गरेका हुन् ।

‘मेरो नेतृत्वमा बनेको सरकार ऐतिहासिक सरकार बन्न पुगेको छ, यसका लागि सबैको साथ सहयोग रहेको छ,’ प्रधानमन्त्री ओलीले भने ।