काठमाडौं । गृहमन्त्री बालकृष्ण खाँणले दार्चुला घटना छानविन गर्न गृहमसचिव महेश्वर न्यौपानेको नेतृत्वमा छानविन समिति गठन गरेका छन् । दार्चुलाको व्यास गाउँपालिका निवासी ३५ वर्षीय जयसिंह धामी महाकाली नदी तुइनबाट तर्दै गर्दा भारतीय सुरक्षा जवानले तुइन काटदा नदीमा खसेर वेपत्ता भएका थिए । भारतीय सुरक्षा फौजको यो ज्यादतीको विरोधमा चौतर्फी विरोध शुरु भईरहेका बेला गृहमन्त्री खाँणले गृहसचिव न्यौपानेकै संयोजकत्वमा छानविन समिति गठन गरेका हुन् ।

घटनामा के भएको हो, किन यस्तो अवस्था आयो ? भन्ने यर्थाथ पत्ता लगाई रिपोट सिधै आफुलाई पेश गर्न भन्दै गृहमन्त्री खाँणले छानविन समिति बनाएका हुन् ।

मन्त्री स्तरीय निर्णयका आधारमा मन्त्री खाँणले समितिमा गृहमन्त्रालयको प्रवक्ता फणिन्द्रमणि पोखरेल, सुदुरपश्चिमका डिआइजी र दार्चुलाको सहायक प्रमुख जिल्ला अधिकारी सदस्य रहने गरी समिति बनाएका हुन् ।

यथासिघ छानविन सकेर प्रतिवेदन वुझाउन गृहमन्त्रीले निर्देशन गरेका छन् ।
महाकाली तर्ने क्रममा एसएसबीले देखेपछि तुइन काटिदिएको स्थानीय विक्रमसिंह धामीले बताए । “भारततर्फ पुग्ने बेला एसएसबीले एक्कासि तुइन काटिदियोे, नदीको बिच भागमा पुग्ने बेला तुइन काटिएपछि उनी बेपत्ता भएका हुन्, पाँच छ जना स्थानीय सामान लिन भारतको बाटो हुँदै आइरहेका थियौँ” धामीले भने, “पाँच छ जना तुइनबाट भारत तरेका थिए, जयसिंह तर्ने बेला एसएसबी पुगेर तुइन काटिदिए, भारत पांगलमा रहेका एसएसबीले तुइन काटिदिएका हुन् ।”

धामी बेपत्ता भएपछि अहिले स्थानीय आक्रोशित बनेका छन् । नेपालतर्फ सडक नहुँदा व्यास क्षेत्रका बासिन्दाले सदरमुकाम खलङ्गा आउनका लागि भारतको बाटो हुँदै महाकाली नदीमा तुइन तरेर आउनुपर्ने बाध्यता छ ।