काठमाडौँ । चर्चित फुटबल खेलाडी लियोलन मेसीले बार्सिलोनासँगको यात्रा टुंग्याएसँगै पत्रकार सम्मेलन गर्ने भएका छन् । २१ वर्ष लामो बार्सिलोनामा बसेका उनले पत्रकार सम्मेलन गरी जानकारी दिने भएका हुन् ।

बार्सिलोनाले यसअघि नै मेसी क्लबबाट निस्किँदै गरेको घोषणा गरेको थियो । बार्सिलोना क्लबले एक विज्ञप्ति जारी गर्दै भनेको छ, ‘३४ वर्षीय मेसीले मध्याह्न हुने प्रेस सम्मेलनमा उहाँको बार्सिलोनासँगको सहकार्य र बिदाइबारे सञ्चारकर्मीले सोधेका प्रश्नहरूको जवाफ दिनु हुनेछ । उहाँको क्लबबाट विदाई घोषणा भएदेखि यी उहाँका पहिलो सार्वजनिक टिप्पणीहरू हुनेछन् ।’

सन् २०१७ मा विश्व कीर्तिमान २२२ मिलियन युरो (२६४ मिलियन अमेरिकी डलर)का लागि बार्सिलोनाबाट नेयमारलाई किनेको पिएसजी फ्रान्सको रिपोर्टअनुसार मेसीसँग उसले करार गर्न चाहेको बुझिएको छ ।

मेसीले पिएसजीलाई क्लबमा सहभागी हुने इच्छा रहेको र तेस्रो सिजनको विकल्पमा दुई वर्षको सम्झौतामा छलफल चलिरहेको जानकारी दिएको फ्रान्सेली टेलिभिजन आरएमसी स्पोर्टले जनाएको छ ।