काठमाडौँ । स्वास्थ्य तथा जनसंख्या मन्त्रालयले सोमबारदेखि कोरोना भाइरस (कोभिड–१९)विरुद्धको खोप ‘कोभिशिल्ड’ लगाएका व्यक्तिलाई दोस्रो मात्राको खोप दिन थालेको छ ।

मन्त्रालयले ६५ वर्षमाथिका ज्येष्ठ नागरिकलाई कोभिशिल्डको दोस्रो मात्राका रुपमा ‘एस्ट्राजेनिका’ खोप दिएको हो । पहिलो चरणको खोप लगाएको लामो समयसम्म खोप नपाएका उनीहरू दोस्रो डोज खोप लगाएसँगै खुसी भएका छन् ।

भूटान र जापानबाट ‘एस्ट्राजेनिका’ खोप आएसँगै मन्त्रालयले कोभिशिल्डका रुपमा उक्त खोप लगाउन थालेको मन्त्रालयका सहप्रवक्ता डा समीरकुमार अधिकारीले जानकारी दिए । उनले कोभिशिल्ड र एस्ट्राजेनिका खोप एउटै कम्पनी र एउटै सूत्रमा बनेकाले लगाउँदा फरक नपर्ने बताएका थिए ।