काठमाडौं । हास्य कलाकार जितु नेपाल र अभिनेत्री साम्राज्ञी आरएल शाहलाई पहिलो पटक एकसाथ चलचित्रमा हेर्न पाइने भएको छ ।

चलचित्र ‘ड्रिम्स’ का निर्माता कपिल रिजालले निर्देशन गर्न लागेको चलचित्रमा उनीहरुले एकसाथ अभिनय गर्न लागेका हुन् । नाम गोप्य राखिएको चलचित्रमा उनीहरु जोडीको रुपमा प्रस्तुत हुनेछन् । जितु र साम्राज्ञीसँग निर्माण टिमले हालै कागजी सम्झौता गरेको हो ।

आउँदो भदौ १५ गतेबाट छायांकन सुरु हुने चलचित्र कमेडी र लभस्टोरीमा निर्माण हुने बताइएको छ । काठमाडौं र पोखराको माथिल्लो भेगमा छायांकन हुने चलचित्रमा कलाकार विजय बरालको पनि मुख्य भूमिका रहनेछ ।

चलचित्रमा उनले जितुको साथीको भूमिका निर्वाह गर्नेछन् । लामो समयदेखि लन्डनमा बस्दै आएका कपिलले यही चलचित्रबाट निर्देशनमा डेब्यू गर्न लागेका हुन् ।

उनले लन्डनमा नै केही सर्ट चलचित्रको निर्माण तथा निर्देशन गरेका छन् । करीब एक दर्जन म्यूजिक भिडियोको समेत निर्देशन गरिसकेका उनी पेशाले दन्त चिकित्सक हुन् ।

चलचित्र निर्माता तथा स्त्रीरोग विशेषज्ञ भोला रिजालका छोरा रहेका कपिल नेपाल आएपछि चलचित्रको घोषणा गरेर छायांकनमा निस्कने तयारीमा छन् । दर्शकलाई जितु र साम्राज्ञीको जोडी पर्दामा हेर्न रोचक हुने देखिन्छ ।