काठमाडौं । गत आर्थिक वर्ष २०७७/७८ मा प्रदेश नं १ को कुल प्रादेशिक गार्हस्थ्य उत्पादन उपभोक्ता मूल्यमा ६ खर्ब ६४ अर्ब रुपैयाँ हुने अनुमान गरिएको थियो ।

केन्द्रीय तथ्यांक विभागको तथ्यांकका आधारमा राष्ट्र बैंकले सार्वजनिक गरेको ‘आर्थिक गतिविधि अध्ययन (प्रदेश १), प्रथम अर्धवार्षिक प्रतिवेदन’मार्फत उक्त प्रक्षेपण गरिएको हो, जुन गत आर्थिक वर्षको कुल राष्ट्रिय अर्थतन्त्रको १५ दशमलब ६ प्रतिशत हो ।

आर्थिक वर्ष २०७६/७७ मा यस प्रदेशको आर्थिक वृद्धिदर १ दशमलब २ प्रतिशत ऋणात्मक रहेकोमा २०७७/७८ मा आर्थिक वृद्धिदर ३ दशमलब ६ प्रतिशत कायम रहने अनुमान गरिएको छ ।

प्रदेशको कुल प्रादेशिक गार्हस्थ्य उत्पादनमा कृषि, उद्योग र सेवा क्षेत्रको योगदान क्रमशः ३५ दशमलब २ प्रतिशत, १६ दशमलब २ प्रतिशत र ४८ दशमलब ६ प्रतिशत रहेको अनुमान छ । गत वर्ष यी क्षेत्रहरूको योगदान क्रमशः ३६ प्रतिशत, १६ दशमलब ४ प्रतिशत र ४८ दशमलब १ प्रतिशत थियो ।

समीक्षा अवधिमा समग्र कृषि बालीले ढाकेको कुल क्षेत्रफल २ दशमबल ३ प्रतिशतले बढेको छ भने सोको उत्पादन १६ दशमलब ८ प्रतिशतले ह्रास आएको छ ।

समीक्षा अवधिमा बैंक तथा वित्तीय संस्थाबाट प्रवाह भएको सहुलियतपूर्ण कर्जा ७१ दशमलब ७ प्रतिशतले वृद्धि भई १६ अर्ब ८५ करोड पुगेको छ । प्रदेशका अध्ययनमा समेटिएका उद्योगको औसत क्षमता उपयोग ५० दशमलब ४ प्रतिशत रहेको छ । गत वर्षको सोही अवधिमा ती उद्योगको उत्पादन क्षमता उपयोग ४५ दशमलब ७ प्रतिशत रहेको थियो ।

समीक्षा अवधिमा प्रदेशमा घर–जग्गा रजिष्ट्रेसनबाट प्राप्त हुने राजस्व २८ दशमलब ३ प्रतिशतले र घर–जग्गा रजिष्ट्रेसन संख्यामा ३दशमलब ९ प्रतिशतले वृद्धि भएको छ भने घर/भवन स्थायी नक्सा पास ५ दशमलब ३ प्रतिशतले ह्रास आएको छ । समीक्षा अवधिमा बैंक तथा वित्तीय संस्थाहरूले यस प्रदेशबाट परिचालन गरेको निक्षेप १२ दशमलब २ प्रतिशतले र यस प्रदेशभित्र प्रवाह गरेको कर्जा १० दशमलब ७ प्रतिशतल वृद्धि भएको छ ।

समीक्षा अवधिमा बैंक तथा वित्तीय संस्थाहरुले प्रवाह गरेको सेवा क्षेत्र अन्तर्गतको कर्जा १६ दशमलब ९ प्रतिशतले वृद्धि भई २ खर्ब ४८ अर्ब ३७ करोड पुगेको छ । गत वर्षको सोही अवधिमा पनि यस्तो कर्जा १६ दशमलब ९ प्रतिशतले बढेको प्रतिवेदनमा उल्लेख छ ।