काठमाडौं । नेकपा एमाले समाजवादी पार्टीका अध्यक्ष माधव कुमार नेपालले नेपाली कम्युनिष्ट आन्दोलनलाई विसर्जन हुनबाट जोगाउन कठोर कदम चालेको बताएका छन् । बुधबार अपिल जारी गर्दै उनले नेकपा एमालेलाई पुनर्गठन र रुपान्तरण गर्न विद्रोह गरी नयाँ पार्टी गठन गरेको बताए ।

उनले केपी शर्मा ओलीको क्रियाकलापका कारण पार्टी विभाजन भएको बताए ।

उनले भने, ‘२०७८ साल भदौ १ गते उहाँले पार्टी नेता र सांसदहरुलाई कारवाही गरी गैरकानूनी रुपमा निष्कासन गर्ने तहमा उभिइसकेपछि वाध्य भएर हामीले कठोर फैसला गर्नुपर्ने अवस्था सिर्जना भएको छ । पार्टीको ठूलो पंतिलाई अन्धकार भविष्यतिर धकेल्ने र निराशाको अवस्थामा पुग्न नदिन र नेपाली कम्युनिष्ट आन्दोलनलाई विसर्जन हुनबाट जोगाउनका लागि हामीले कठोर कदम चाल्नुपर्ने स्थिति उत्पन्न भएको छ । नेकपा एमालेको पुनर्गठन एववम् रुपान्तरण गर्दै नेपाली कम्युनिष्ट आन्दोलनको रक्षा गर्ने उद्देश्यले विकल्पको बाटो रोज्नुपर्ने वाध्यकारी अवस्था सिर्जना भएको छ ।’

पार्टी विभाजन हुनुको मुख्य कारण ओलीले अंगीकार गरेको गलत विचार र गलत व्यवहार भएको भन्दै उनले ओली पार्टीका सिद्धान्त, नीति, विचार र पार्टीको नवौ महाधिवेशनबाट पारित गरिएका निर्णय अनुसार नचलेको आरोप लगाए ।