काठमाडौं । रौतहटका पत्रकार महम्मद मोजिबुल्लाह पक्राउ गरिएको घटनाप्रति नेपाल पत्रकार महासंघले आपत्ति जनाएको छ ।

महासंघका महासचिव रोसन पुरीले विज्ञप्ति जारी गर्दै रौतहट एक्सप्रेसका सञ्चालक पत्रकार मोजिबुल्लाहको मोटरसाइकलमा प्रहरीको संलग्नतामा प्रतिबन्धित नाइट्रोभेट टेबलेट लागुऔषध राखेर पत्रकार मोजिबुल्लाहसहित उनका चालकलाई पक्राउ गरिएको घटनाप्रति महासंघले आपत्ति जनाएको उल्लेख गरिएको छ ।

विज्ञप्तिमा भनिएको छ, ‘महासंघ रौतहट शाखाका अनुसार २०७८ साउन ३२ गते राति ८ः०० बजेतिर रौतहटस्थित होटेल ग्रीन सिग्नल अगाडि रोकी राखेको पत्रकार मोजिबुल्लाहको मोटरसाइकलमा अपराध अनुसन्धानमा खटिएका नेपाल प्रहरीका घुमुवा प्रहरी सहायक निरीक्षक उदयप्रसाद यादव, प्रहरी जवान मनोज साहलगायकतका घुमुवा प्रहरी र अन्य बाहिरी व्यक्तिहरूको संलग्नतामा उक्त लागुऔषध राखिएको सिसिटिभी फुटेजमा देखिएको जनाएको छ ।’

महासंघले घटनाको छानबिन गरी दोषीमाथि कानुनी कारबाही गर्न र सिसिटिभी फुटेजबाट निर्दोष देखिएका पत्रकार मोजिबुल्लाहसहित उनका चालकलाई तत्काल रिहा गर्न माग गरेको छ ।