काठमाडौँ । नेपाली कांग्रेसका सभापति शेरबहादुर देउवाको विकल्पमा साझा उम्मेदवार खोज्ने वरिष्ठ नेता रामचन्द्र पौडेल पक्ष सहमतिमा पुगेको छ । काठमाडौँको गौशलास्थित अनुपम फुडल्याण्डमा सभापतिका आकांक्षीहरू जम्मा भई बैठकमा सबैलाई मान्य हुने उम्मेदवार चयन गर्न छलफललाई निरन्तरता दिने सहमति भएको बैठकमा सहभागी एक नेताले मेरोन्युजलाई जानकारी दिए ।

ती नेताका अनुसार आजको बैठकमा कसरी सबैलाई मान्य हुने साझा उम्मेदवार तय गर्न सकिन्छ भन्ने विषयमा छलफल भएको छ । ‘सभापतिका आकांक्षी बनेका पौडेल–कोइराला समूहका नेताहरूले १४ औँ महाधिवेसनमा सभापतिको साझा उमेदवार खोज्न छलफलमा जुटेका हौँ,’ उनले मेरो न्युजसँग भने, ‘हाम्रो समूहबाट साझा उम्मेदवार बनाउन सके हामीले १४ औँ महाधिवेशन जित्छौँ ।’

उक्त सभापतिका आकांक्षीहरूको बैठकमा वरिष्ठ नेता रामचन्द्र पौडेल, अर्जुननरसिंह केसी, प्रकाशमान सिंह, महामन्त्री शशांक कोइराला, डा शेखर कोइरालालगायत नेता उपस्थित थिए ।