काठमाडौं । नेपाल स्टक एक्सचेञ्ज (नेप्से)का प्रमुख कार्यकारी अधिकृत (सीइओ) चन्द्रसिंह साउदले राजीनामा दिएका छन् । मंगलबार अर्थ मन्त्रालय पुगेर उनले राजीनामा बुझाएका हुन् ।

राजीनामा दिएपछि उनले पत्रकार सम्मेलन गर्दै सर्वोत्तम सिमेन्टको सेयर खरिद प्रकरणमा मुछिएका साउदले अध्ययन र अनुसन्धानलाई सहज बनाउनलाई आफूले पदबाट राजिनामा दिएको जानकारी दिए ।

पत्रकार सम्मेलन गर्नु अगाडी साउदले नेप्सेका अध्यक्षसमेत रहेका अर्थ मन्त्रालय अन्तर्गतको वित्तीय क्षेत्र व्यवस्थापन तथा संस्थान समन्वय महाशाखाका सह–सचिव दीर्घराज मैनाली समक्ष राजिनामा पत्र बुझाएका हुन् ।

साउदले कार्यकाल सकिन करिब ५ हप्ता मात्र बाँकि रहदा पदबाट राजिनामा दिएको धितोपत्र बोर्डले जनाएको छ । उनको कार्यकाल आगामी असोज २२ सम्म थियो । साउदले आफुले नैतिकताको आधारमा मात्र पदबाट राजिनामा दिएको बताए ।

यसअघि साउँदलाई अर्थमन्त्रालयले सर्वोत्तम सिमेन्टको ओटीसीमाध्यमबाट शेयर खरिद गरेको विषयमा स्पष्टिकरण सोधेको थियो । उक्त विषयमा छानबिनका लागि समेत अर्थ मन्त्रालयले समिति गठन गरेको थियो ।