काठमाडौँ । नेकपा माओवादी केन्द्रको भातृ संगठन वाइसिएल नेपालको उद्घाटनमा बोल्दै पार्टी अध्यक्ष पुष्पकमल दाहाल ‘प्रचण्ड’ले तत्कालीन नेपाली कांग्रेसका सभापति गिरिजाप्रसाद कोइराला (गिरिजा बाबु)लाई सम्झिएको बताएका छन् । उनले आफूले युवा अवस्थादेखि राजनीतिमा भोगेका विभिन्न चरण सम्झिदै जाँदा कोइरालालाई सम्झिएको बताएका हुन् ।

अध्यक्ष प्रचण्डले आगामी दिनमा युवा नेताहरूको एकताबाट गठबन्धनद्वारा निर्माण भएको सरकारलाई जोगाउनु पर्ने बताए । ‘पार्टीमा युवाहरूलाई चाँडोभन्दा चाँडो नेतृत्वमा ल्याउनु पर्ने अवस्था आएको छ, त्यसैलै हामीले पार्टीमा २० प्रतिशत युवाहरू नेतृत्वमा हुने बनाएका छौँ,’ उनले भने ।

यस्तै, उनले आगामी दिनमा युवा साथीहरू उत्पादन क्षेत्रमा लागु पर्ने बेला आएको बताए । ‘हामी जनयुद्धमा हुँदा पनि जनताको घरमा पुगेर उत्पादनको क्षेत्रमा लाग्यौँ, त्यसैले जनताले आफ्नो छोराछोरीलाई युद्धमा होमिन दिए,’ उनले भने, ‘यदि, यस्तो नगरेको भए, हाम्रो युद्ध पूरा हुँदैन थियो ।’

‘जनतालाई हामीले झुठ नबोल्ने, जे बोलिएको छ–त्यही गर्नु पर्ने बेला आएको छ,’ उनले भने, ‘यस्तै गर्ने हो भने अरूको पार्टीमा गएर बसे भइहाल्यो नि त ।’

अध्यक्ष प्रचण्डले माओवादी र एमाले एकता हुँदा केपी शर्मा ओलीले ठगी गरेको आरोप लगाए । ‘हामीले जे जे भनेका थियौँ, त्यहीअनुसार केपी ओलीले हस्ताक्षर गरे, त्यो पछि लागु भएन,’ उनले भने, ‘यो त ओलीको ठगी धन्दा रहेछ नि !’