काठमाडौँ । सर्वोच्च अदालतले महाकवि लक्ष्मीप्रसाद देवकोटाको घर पुरातत्व विभागसँग समन्वय गरेर मात्र भत्काउन अन्तरिम आदेश दिएको छ ।

आइतबार न्यायाधीश अनिलकुमार सिन्हा र बमकुमार श्रेष्ठको संयुक्त इजलासले पुरातत्व विभागसँग समन्वय गरेर घर भत्काउन अन्तरिम आदेश दिएको हो । आदेशको लिखित पाठ आउन भने बाँकी छ ।

सर्वोच्चले महाकवि देवकोटाको घरमा पुरातात्विक महत्वका सामग्री हुनसक्ने भएकाले पुरातत्व विभागसँग समन्वय गरेर मात्र घर भत्काउन अन्तरिम आदेश जारी गरेको जनाएको छ । यस्तै सर्वोच्चले पुरातात्विक महत्वका सामग्री व्यवस्थापन नगर्दासम्म तत्काल घर नभत्काउन पनि आदेश दिएको छ ।

यसअघि गत साउन २७ गते न्यायाधीश तेजबहादुर केसीको एकल इजलासले घर भत्काउनको कारणबारे १५ दिनभित्र लिखित जवाफ पेस गर्न नेपाल प्रज्ञा प्रतिष्ठानलगायतलाई आदेश दिएको थियो । अधिवक्ता सञ्जय अधिकारीले पुरातात्विक महत्वको घर भत्काउने काम रोक्न आदेशको माग गर्दै सर्वोच्चमा अदालतमा रिट दायर गरेका थिए ।