काठमाडौँ । बागमती प्रदेशमा एमालेबाट निर्वाचन जितेका १२ जना प्रदेशसभा सदस्यहरू नेकपा एकीकृत समाजवादीमा आबद्ध भएका छन् । सामाजिक विकास मन्त्री कृष्ण खनालसहित १२ जना प्रदेशसभा सदस्यहरूले मंगलबार नेकपा एमाले छाडेर नवगठित पार्टी गएको भन्दै प्रदेश निर्वाचन कार्यालयमा सनाखत गरेका हुन् ।

प्रदेश निर्वाचन कार्यालय, हेटौंडामा उपस्थित भई सनाखत गर्नेहरूमा मन्त्री खनालसहित प्रदेशसभा सदस्यहरू राजेन्द्र पाण्डे, मुनु सिग्देल, रमा आले मगर, लक्ष्मण लम्साल, बसुन्धरा हुमागाई, माधव पौडेल, वसन्त मानन्धर, पार्वती सिलवाल, कुसुम कार्की, इन्द्रमाया गुरुङ र राजेन्द्रमान श्रेष्ठ रहेका छन् ।

एमाले छाडेर १२ जना प्रदेशसभा सदस्यहरूले नयाँ दल रोजेसँगै मुख्यमन्त्री अष्टलक्ष्मी शाक्य नेतृत्वको प्रदेश सरकार अल्पमतमा परेको छ । उनी अल्पमतमा परेसँगै विश्वासको मत लिनु पर्ने हुन्छ ।

गत २ गते मुख्यमन्त्री बनेकी शाक्य नवगठित दल नेकपा एकीकृत समाजवादीका अध्यक्ष माधव कुमार नेपाल पक्षबाट एमालेमा फर्किएकी थिइन ।

बागमतीमा प्रदेशसभामा एमालेका ५१ जना प्रदेशसभा सदस्य रहेका थिए ।