काठमाडौँ । सरकारले चीनसँगको सीमा विवाद अध्ययन गर्न समिति गठन गरेको छ । बुधबार बसेको मन्त्रिपरिषद् बैठकले हुम्लाको नाम्खा गाउँपालिकाको लिमी लाप्चादेखि हिल्लासम्मको सीमा क्षेत्र समस्या अध्ययन गर्न समिति गठन गर्ने निर्णय गरेको हो ।

सरकारले हुम्लामा नीनसँगको सीमा समस्या अध्ययन गरी नेपाल सरकारलाई प्रतिवेदन पेश गर्न गृह मन्त्रालयका सहसचिवको संयोजकत्वमा नापी विभाग, नेपाल प्रहरी, सशस्त्र प्रहरी र सीमा विज्ञ रहेको समिति गठन गरेको कानूनमन्त्री ज्ञानेन्द्रबहादुर कार्कीले बताए ।

यस्तै सरकारले केपी शर्मा ओली नेतृत्वको सरकारले वृद्धि गरेको सामाजिक सुरक्षा भत्ता कार्यान्वयन गर्ने निर्णय गरेको छ । तत्कालीन अर्थमन्त्री विष्णु पौडेलले बजेट भाषणमा सबै प्रकारको सामाजिक सुरक्षा भत्ता ३३ प्रतिशतले बढाएका थिए ।

उक्त सामाजिक सुरक्षा भत्तालाई वर्तमान सरकारले निरतरता दिने निर्णय गरेको छ ।