काठमाडौँ । नेकपा एमालेले निर्वाचन आयोग र सभामुख अग्नि प्रसाद सापकोटाविरुद्ध दायर गरेको रिट आज सुनुवाई हुने भएको छ । न्यायाधीश मीरा खड्काको एकल इजलासमा उक्त मुद्दाको पेशी तोकिएको छ ।

गत १६ गते एमालेले सर्वोच्चमा निर्वाचन आयोग, सभामुख अग्नि सापकोटा र लुम्बिनी प्रदेशका सभामुख पूर्णबहादुर घर्तीविरुद्ध तीन वटा रिट निवेदन दर्ता गरेको थियो । निर्वाचन आयोगविरुद्धको रिट निवेदनमा बदनीयतपूर्ण र अनाधिकृत व्यक्तिलाई हस्ताक्षर गराएर एमाले फुटाएको भन्दै अन्तरिम आदेश माग गरिएको छ ।

त्यसैगरी पार्टीले कारबाही गरेका एमालेका सांसदहरूलाई सभामुखले सूचना टाँस नगरेको र लुम्बिनी प्रदेशका सभामुखले प्रदेश सांसदलाई कारबाही गरेको सूचना टाँस नगरेको भन्दै रिट निवेदन दर्ता गरिएको थियो ।