काठमाडौँ । सुदूरपश्चिम प्रदेशमा नेकपा एकीकृत समाजवादी पार्टी नेकपा एमालेभन्दा ठूलो दल बनेको छ । एमालेबाट चुनाव जितेका थप तीन प्रदेशसभा सदस्यहरू एकीकृत समाजवादी पार्टीमा सनाखत गरेसँगै समाजवादी ठूलो दल बनेको हो ।

सांसदहरू तारालामा तामाङ, दीर्घ सोडारी र प्रकाश रावलले आइतबार निर्वाचन कार्यालय पुगेर एकीकृत समाजवादीको पक्षमा सनाखत गराएका हुन् । यसअघि दश जना सांसदले एकीकृत समाजवादीमा सनाखत गराइसकेका थिए ।

सुदूरपश्चिम प्रदेशका भौतिक पूर्वाधार विकास मन्त्री सोडारीले अब छिट्टै संसदीय दल गठन गर्ने बताए । अब, सुदूरपश्चिम प्रदेशसभामा एमालेका सभामुखसहित १२ र एकीकृत समाजवादीका १३ सांसद भएका छन् ।

यसबाहेक नेपाली कांग्रेसका १२, नेकपा माओवादी केन्द्रका १३ र जनता समाजवादी पार्टीका २ जना सांसद रहेका छन् ।