काठमाडौं । बलिउड अभिनेत्री शिल्पा सेट्ठीका श्रीमान राज कुन्द्रा धरौटीमा छुटेका छन् ।

पोर्नोग्राफी अर्थात अश्लील भिडिओ बनाएको अभियोगमा पक्राउ परेका कुन्द्रा धरौटीमा छुटेका हुन् । मुम्बईको एक अदालतले ५० हजार रुपैयाँ धरौटीमा कुन्द्रालाई रिहा गरेको बीबीसीले जनाएको छ ।

गत बिहीबार मुम्बई प्रहरीले कुन्द्रविरूद्ध करिब १४ सय पृष्ठको अभियोग पत्र अदालत समक्ष पेश गरेको थियो । राजले शनिबार अनुसन्धान सकिएको र अभियोग पत्र बुझाइसकेको भन्दै जमानतका लागि अपील गरेका थिए ।

प्रहरीले कुन्द्राको मडस्थित ग्रीन पार्क बंगलामा छापा मार्दा अश्लिल फिल्मको सुटिङ भइरहेको थियो । उनीसँगै पक्राउ परेका एक महिलासहित पाँच जना पनि सोमबार नै रिहा भएका छन् ।

कुन्द्रा गत जुलाइ १९ मा पक्राउ परेका थिए । उनले सुरूदेखि नै आफूमाथि झूटो आरोप लागेको बताउँदै आएका थिए । यसअघि पनि उनले धेरैपटक जमानतका लागि अपील गरे पनि अदालतले अस्वीकार गर्दै आएको थियो ।

यद्यपि प्रहरीको अभियोगपत्रमा राजलाई अश्लील फिल्म बनाउने ‘मुख्य योजनाकार’ भनिएको छ । उनले फिल्म दुनियाँमा संघर्ष गरिरहेका युवतीहरूलाई प्रलोभन दिएर अश्लील भिडिओमा खेलाएको आरोप छ ।

शिल्पा र राजको सन् २००९ मा बिहे भएको थियो । उनीहरूका एक छोरा र एक छोरी छन् ।