काठमाडौँ । नेपाली कांग्रेसका सभापति शेरबहादुर देउवाले स्वास्थ्य मापदण्ड पालना गरी अधिवेशनमा सहभागी हुन आग्रह गरेका छन् । उनले आजदेखि सुरु भएको पालिका स्तरीय अधिवेशनमा सहभागी हुने सबैलाई स्वास्थ्य मापदण्ड पालना गर्न आग्रह गरेका हुन् ।

उनले सामाजिक सञ्जाल फेसबुकमार्फत नेता कार्यकर्तालाई अधिवेशनमा सहभागी हुँदा स्वास्थ्य मापदण्ड पालना गर्न आग्रह गरेका हुन् । यस अवसरमा उनले कांग्रेसका नगर र गाउँ प्रतिनिधिलाई शुभकामनासमेत दिएका छन् ।

‘तपाईंहरूको पार्टीप्रतिको विश्वास र प्रतिबद्धताले कांग्रेसलाई थप बलियो बनाउने छ, जनताको मन जित्ने गरी नगर र गाउँपालिकामा आफ्नो भूमिकालाई प्रभावकारी बनाउनु हुनेछ भन्ने अपेक्षा गरेको छु,’ उनले भने ।

कांग्रेसको १४ औँ महाधिवेशनअन्तर्गत आजदेखि गाउँ तथा नगर अधिवेशन सुरु भएको छ । कांग्रेसले वडा अधिवेशन सम्पन्न गरिसकेको ६४ जिल्लामा एकैसाथै पालिका स्तरीय अधिवेशन गर्ने भनिए पनि सम्भव हुन सकेन ।