काठमाडौँ । दशैँमा घर जानको लागि अग्रिम टिकट बुकिङ खुला भएको छ । सरकारले काठमाडौँबाट दशैँमा घर जानको लागि सोमबारदेखि अग्रिम टिकट बुकिङ खुला गरेको हो ।

सरकारले यातायात व्यवसायीसँग छलफल गरेर लामो तथा मध्यम दूरीका बसको अग्रिम टिकट बुकिङ खुला गरेको छ । यस्तै नयाँ बसपार्कमा अग्रिम टिकट बुकिङका लागि ११ वटा ‘टिकट काउन्टर’ पनि थप गरिएको छ । नयाँ बसपार्कबाट देशभरका ६५ भन्दा बढी जिल्लामा सार्वजनिक गाडी आवतजावत गर्छन ।

महानगरीय ट्राफिक प्रहरी महाशाखाले चाडपर्वलाई लक्षित गरेर काठमाण्डौँका विभिन्न १४ ठाउँमा यात्रु सहायता कक्ष स्थापना गरेको छ । यस्तै सरकारले देशभर लागू हुने गरी सार्वजनिक यातायातमा नयाँ भाडादर लागु गरेको छ ।

यातायात व्यवस्था विभागले देशभर नयाँ भाडादर कार्यान्वयनमा ल्याएको हो । विभागले यात्रुवाहक यातायातमा २८ प्रतिशत, पहाडी बाटोमा सञ्चालन हुने मालवाहक गाडीमा २० प्रतिशत र तराईको बाटोमा सञ्चालन हुने मालवाहक गाडीमा २६ प्रतिशत भाडा बढाएको छ ।