काठमाडौँ । सरकारले चाडपर्वलाई लक्षित गर्दै बजार अनुगमनलाई तीव्रता दिएको छ । वाणिज्य, आपूर्ति तथा उपभोक्ता संरक्षण विभागले मंगलबार चाडपर्वलाई लक्षित गरी काठमाडौँको न्यूरोड र मख्खन गल्लीमा अनुगमन गरेको हो ।

बजार अनुगमनपछि वाणिज्य, आपूर्ति तथा उपभोक्ता संरक्षण विभागका निरीक्षण अधिकृत अमितकुमार झाले न्यूरोड र मख्खन गल्लीमा ७ वटाभन्दा धेरै पसलमा अनुगमन गरेको बताए । उनले पसलहरूले बिक्री गरिरहेका लत्ताकपडा तथा खाद्य सामग्रीहरूको अनुगमन गरेको बताए । अनुगमनमा मुख्य समस्या खरिद बिक्री बिलको रहेको बताए ।

उनले तीन जनालाई तत्काल जरिवाना गरेको र अन्य तीन जनालाई विभागमा बोलाएको बताए । उनले पसलमा मुख्य व्यापारी नभएकाले तीन दिनभित्र विभागमा उपस्थित हुनु पर्ने बताए ।

‘हामीले चाडपर्वलाई लक्षित गरेर बजार अनुगमन तीव्र बनाएका छौँ, आज न्यूरोड र मख्खनगढीमा हाम्रो टोलीले अनुगमन गरेको छ,’ निरीक्षण अधिकृत झाले भने, ‘त्यहाँका ७ वटाभन्दा धेरै पसलमा अनुगमन गरेका छौँ, त्यसमध्ये ३ वटालाई कारबाही गरेका छौँ भने बाँकीलाई विभागमा बोलाएका छौँ ।’

निरीक्षण अधिकृत झाले अहिले निरन्तर रुपमा चाडपर्वलाई लक्षित गरेर अनुगमन तीव्र बनाइएको जानकारी दिए ।