काठमाडौं । भारतसँग सिमा विवाद, नाकावन्दी लगायत अन्य राजनीतिक कारणवाट विग्रेको सम्वन्ध सुधारको प्रयासमा सत्तासिन दल नेपाली कांग्रेस लागेको छ । त्यसका लागि कांग्रेसले भारतसँग सम्बन्ध सुधारका लागि एक प्रतिनिधिमण्डललाई भोलि बिहीबार भारत पठाउने तयारी गरेका छ ।

कांग्रेस सहमहामन्त्री डा प्रकाशशरण महतको नेतृत्वमा कांग्रेसले प्रतिनिधीमण्डल भारत पठाउन लागेको हो । भारतीय सत्तारुढ दल भारतीय जनता पार्टी (भाजपा) र सरकारसँग सम्बन्ध सुधारका लागि कांग्रेसले महतको नेतृत्वमा तीन सदस्यीय टोली भारत पठाउन लागेको हो । टोलीमा उदय शम्शेर जबरा र अजय चौरसिया रहने कांग्रेसले जनाएको छ ।

भाजपाका वैदेशिक मामिला विभागका प्रमुख विजय चौथाइवालेको निमन्त्रणामा कांग्रेसले महत लगायतको तीन सदस्यीय टोलीलाई भारत पठाउन लागेको हो ।

प्रतिनिधिमण्डलले भाजपा अध्यक्ष जेपी नड्डा, राष्ट्रिय महासचिव अरुण सिंह र वैदेशिक मामिला विभागका प्रमुख चौथाइवाले र भारतीय विदेशमन्त्री एस जयशंकरलाई भेट्ने कार्यक्रम तय भएको छ ।

यसअघि चौथाइवाले भदौको पहिलो साता कांग्रेसका सहमहामन्त्री महतको निमन्त्रणामा नेपाल भ्रमणमा आएका थिए । उनले प्रधानमन्त्री शेरवहादुर देउवा पत्नी डा आरजु राणाको हातबाट राखी वाधेर भातृत्व आदानप्रदान गरेका थिए ।