काठमाडौं । नेकपा (क्रान्तिकारी माओवादी)ले भारतीय सेनासँग नेपाली सेनाको संयुक्त सैन्य अभ्यास गराएर सरकारले भारतीय शासक वर्गसँग ताबेदारी गरेको आरोप लगाएको छ ।

क्रान्तिकारी माओवादी दुई सम्म चलेको पोलिटब्यूरो बैठकले नेपाल–भारत संयुक्त सैन्य अभ्यासको विरोध गरेको छ ।

गत असोज ४ गतेदेखि १६ गतेसम्म भारतको पिथौरागढमा सञ्चालित “एक्स सूर्य किरण” पन्ध्रौँ समूहको नेपाल–भारत गुणस्तरीय संयुक्त सैनिक अभ्यास भएको थियो ।

नेपाली सेनाका प्रमुख सेनानीको नेतृत्वमा ३ सय जना नेपाली सेनाले उक्त संयुक्त सैन्य अभ्यासमा सहभागिता जनाएका थिए ।

उक्त अभ्यासमा सैनिक युद्धकलाका साथै प्राकृतिक प्रकोप एवं कोभिड–१९ महामारीजस्ता विपद्काबेला सुरक्षा फौजको भूमिकाको व्यावहारिक अभ्यासका साथै सहभागी फौजले आ–आफ्नो पेशागत अनुभवसमेत साटासाट गरेका थिए ।

संयुक्त सैनिक अभ्यासले दुई देशबीचको मैत्रीपूर्ण पारस्परिक सम्बन्धलाई थप प्रगाढ तुल्याउन तथा सकल दर्जामा आधारभूत सैनिक सीपको विकास एवं आपसी समझदारी बढाउन योगदान पुग्ने नेपाली सेनाले विश्वास गर्दै आएको छ ।

यस्तै, क्रान्तिकारी माओवादीको वैठकले कालापानीबाट भारतीय सेना तुरुन्त फिर्ता गर्न र सो क्षेत्रमा नेपाली सेना खटाउन सरकारसँग माग गर्ने निर्णय गरेको छ ।

वैठकले लिपुलेक तथा लिम्पियाधुरासहित कालापानी क्षेत्रमा अविलम्ब जनगणना गर्न नेपाल सरकारसँग जोडदार माग गर्ने निर्णय गरेको क्रान्तिकारी माओवादीका महासचिव मोहन वैद्यले विज्ञप्ति मार्फत जनाएका छन् ।