काठमाडौँ । अज्ञात समूहले गोली प्रहार गरी ८ लाख रुपैयाँ नगद लुटेको छ । कपिलवस्तुको गोरुसिंगे जंगलमा कारमा सवारमाथि अज्ञात समूहले गोली प्रहार गरी नगद लुटेको हो ।

प्रहरीका अनुसार बुद्धभूमि नगरपालिका १० स्थित तिलौराकोट साझेदारी वन कार्यालय नजिक मोटरसाइकलमा आएका दुई जनाले गोली प्रहार गरी नगद लुटेर भागेका हुन् ।

बिहीबार दिउँसो प्रदेश ३–०१–०२३ च ८०८९ नम्बरको कारमा सवार कपिलवस्तुको मायादेवी गाउँपालिका ४ चाकर चौडाका रामरक्षा जैसवालमाथि गोली प्रहार भएको जिल्ला प्रहरी कार्यालय कपिलवस्तुले जनाएको छ ।

गोली प्रहार गरी नगद लिएर जानेहरूको खोजी कार्य भइरहेको प्रहरीले जनाएको छ ।