काठमाडौं । सरकारले ६ महिनापछि ड्राइभिङ लाइसेन्सको अनलाइन आवेदन खुलाएको छ । वैशाख १६ गतेदेखि रोकिएको अनलाइन आवेदन मंगलबारबाट खुला गरिएको यातायात व्यवस्था विभागले जनाएको छ ।

यद्यपि आवेदनमा कोटा प्रणाली भने कायमै रहने विभागले सूचना प्रकाशित गरि जनाएको छ ।

विभागका प्रवक्ता लोकनाथ भुसालका अनुसार देशभरबाट २१ कार्यालयको आ–आफ्नो क्षमता अनुसारको कोटा अन्तर्गत आवेदन संकलन गर्दा दिनमा करिब ५ हजारमात्र आवेदन संकलन गरिने छ ।

लाइसेन्सको लागि नयाँ आवेदन बन्द भए पनि ट्रायल परीक्षा भने सुचारु गरिएको थियो ।

कोरोना महामारीअघिसम्म नयाँ लाइसेन्सको आवेदन दिनेको संख्या दैनिक ८ हजार जनाको थियो  ।

लामो समयसम्म आवेदन बन्द हुँदा लाइसेन्सको माग बढ्ने अनुमान विभागको छ ।