पोखरा । कास्कीमा तिहारको अवसरमा राति १० बजेपछि देउसी भैलो खेल्न प्रतिबन्ध लगाइएको छ । जिल्ला प्रशासन कार्यालय कास्कीले आइतबार सूचना जारी गर्दै राती १० बजेछि देउसी भैलो खेल्न रोक लगाएको हो ।

कोरोना सङ्क्रमण दर अपेक्षित नघटेको भन्दै सम्पूर्ण स्वास्थ्य मापदण्ड अपनाएर राती १० बजेसम्म मात्र देउसी भैलो नाचगान गर्न प्रशासनले आदेश दिएको छ ।

यस्तै, प्रशासनले पटका, आतसवाजी, झिरझिरे, भूइँचम्पा जस्ता विष्फोटकजन्य पदार्थ प्रयोग र निकासी, ओसारपोसारमा पूर्ण प्रतिवबन्ध लगाएको छ ।

मादक पदार्थ सेवन गरी सार्वजनिक शान्ति र सुरक्षालाई असर पर्ने गरी सार्वजनिक स्थानमा होहल्ला गर्ने एवं झैंझगडा गर्ने जस्ता कार्य नगर्न र भीडभाडजन्य गतिविधि गरी समाजमा शान्ति एवं अशोभनीय क्रियाकलापजन्य कार्यहरू नगर्न पनि प्रशासनले अनुरोध गरेको छ ।

त्यस्तै, मठ मन्दिर, गुम्बा लगायतका धार्मिक स्थलहरूमा अनावश्यक भिडभाड हुन नदिई स्वास्थ्य मापदण्ड पूर्ण रूपमा पालना गरी पूजापाठ लगायतका धार्मिक कार्य सञ्चालन गर्न आग्रह गरेको छ ।