काठमाडौँ । नेपाल बार एशोसिएसनले प्रधानमन्त्री र सांसदहरूलाई प्रधान्यायधीशविरुद्ध गम्भीर कदम चाल्न आग्रह गरेको छ । प्रधानन्यायाधीश चोलेन्द्र शमशेर राणाको राजीनामा माग गर्दै आन्दोलनरत नेपाल बारले नेताहरूलाई उनीविरुद्ध महाअभियोग लगाउनसमेत संकेत गर्दै गम्भीर कदम चाल्न आग्रह गरेको हो ।

यस्तै, एशोसिएसनले आगामी एक हप्ताका लागि थप आन्दोलनको कार्यक्रमसमेत तय गरेको छ । सोमबार बसेको एशोसिएसनको कार्यसमिति बैठकले सर्वोच्च अदालत केन्द्रित आन्दोलनलाई विस्तार गरी जिल्ला स्तरमा समेत आन्दोलन गर्ने भएको छ ।

एशोसिएसनले आगामी २३ देखि ३० गतेसम्म उपत्यकाका जिल्लाहरू तथा उच्च अदालत र न्यायाधिकरण बारमा पनि कालोपट्टी बाँधेर विरोध गर्ने निर्णय गरेको छ ।

एशोसिएसनले प्रधानन्यायाधीश जबराले बोलाएको न्याय परिषद् र न्याय सेवा आयोगको बैठकमा समेत सहभागी नहुन निर्णय गरेको छ । यस्तै, अदालत परिसरमा दंगा प्रहरी हटाउन अदालत प्रशासनसँग माग गरेको छ ।