काठमाडौँ । प्रधानन्यायाधीश चोलेन्द्र शमसेर जबराले सर्वोच्च अदालतका न्यायाधीशसँगको अघोषित सहमति तोडेका छन् । प्रधानन्यायाधीश जबराले न्यायाधीशहरुसँग बन्दी प्रत्यक्षीकरणको निवेदनबाहेक अरु मुद्दाको पेसी नतोक्ने र आफूलाई पनि इजलास नतोक्ने अघोषित सहमति गरेका थिए ।

तर उनले मंगलबार उक्त सहमतिलाई तोड्दै सबै न्यायाधीशलाई नियमित मुद्दाको पेशी तोक्नुका साथै आफूलाई पनि इजलास तोकेका छन् । उनले यसअघि बन्दी प्रत्यक्षीकरणका मुद्दामात्र पेशीमा चढाउदै आएका थिए भने आफ्ना लागि इजलास तोकेका थिएनन् । प्रधानन्यायाधीश जबराले आफ्ना लागि एकल इजलाससहित अन्य ९ वटा इजलास तोकेका छन् ।

यसअघि प्रधानन्यायाधीश जबराले सोमबार आफ्नो राजिनामा मागिरहेका न्यायाधीशहरुलाई नियमित काममा फर्किने वा अन्य बाटो रोज्ने भन्ने विकल्प सुझाएका थिए । उनले न्यायिक अराजकता लामो समय नरहने भन्दै मंगलबारदेखि इजलास तोक्ने बताएका थिए । तर नेपाल बार एशोसिएसनले आफूलाई इजलास नतोक्न प्रधानन्यायाधीश जबरालाई चेतावनी दिएको थियो ।

यसबाट प्रधानन्यायाधीशको राजीनामा माग गरिरहेका न्यायाधीशहरु र आन्दोलिन गरिरहेका कानून व्यवसायीहरू थप आक्रोशित हुने देखिएको छ ।