काठमाडौँ । सरकारले १२ देखि १७ बर्ष उमेर समूहका बालबालिकालाई विधालयमै कोरोना विरुद्धको खोप लगाउने भएको छ । आगामी पुस ४ गतेदेखि १४ गतेसम्म १० दिन करिब १८ लाख बालबालिकालाई विद्यालयमै कोरोना भाइरसविरुद्धको खोप दिने निर्णय सरकारले गरेको छ ।

यस्ता बालबालिकालाई मोडर्ना खोप दिइन लागेको स्वास्थ्य सेवा विभाग ले जनाएको छ ।

यो ५७ जिल्लाका बालबालिकालाइृ लक्षित गरेर विधालयमै दिइन लागिएको हो । उनीहरुलाइृ पहिलो चरणको खोपका रुपमा यो खोप दिइन लागेको स्वास्थ्य सेवा विभागले जनाएको छ ।

त्यसैगरी दोस्रो चरणको खोप माघ २ देखि १२ भित्र दिने तयारी पनि विभागले गरेको छ । जिल्ला शिक्षा कार्यालय र विद्यालयहरुसँग समन्वय गरेर कुन विद्यालयमा कति जना विद्यार्थीहरु छन् भनेर तथ्यांक संकलन गर्ने काम भईरहेको र त्यही आधारमा पायक पर्ने विधालयमै खोप केन्द्र राखेर विधार्थीहरुलाई खोप दिने निर्णय विभागले गरेको हो ।

यसअघि फाइजर खोप सञ्चालन भइसकेका १९ जिल्लामा भने यो खोप दिइने छैन । यसअघि फाइजर खोप काठमाडौं, ललितपुर, भक्तपुर, मोरङ, सुनसरी, सप्तरी, पर्सा, झापा, धनुषा, चितवन, काभ्रे, कास्की बागलुङ, रुपन्देही, दाङ, बाँके, कैलाली, सुर्खेत र डडेलधुरामा दिईएको थियो ।

यसअघि, सरकारले १२ देखि १८ वर्ष उमेर समूहका दीर्घरोगी बालबालिकालाई फाइजर खोप दिइसकेको छ ।