काठमाडौं । नेकपा मालेका महासचिव सीपी मैनालीले न्यायपालिकासँग भागबण्डा गरेर सत्ता सञ्चालन भइरहेको आरोप लगाएका छन् ।

नेपाली कांग्रेसको १४ औं महाधिवेशनको शुक्रबार काठमाडौंमा अयोजित उदघाटन समारोहमा शुभकामना दिँदै मैनालीले न्यायपालिकासँग भागबण्डा गरेर शासन चलिरहँदा निश्पक्ष हुन नसकेको बताए ।

नेता मैनालीले देशको संसदीय ब्यवस्था नै अप्ठेरोमा परेको भन्दै देशको स्वतन्त्रता, सार्वभौमसत्तालाई जोगाउँदै अगाडि बढ्न सुझाव दिए । ब्यवस्था धेरै परिवर्तन भए पनि अवस्था परिवर्तन नभएको उनले गुनासो गरे ।

मैनालीले कांग्रेसको महाधिवेशनले एकताको महाधिवेशनको रुपमा अगाडि बढ्नुपर्ने शुभकामना दिए ।