काठमाडौँ । नेपाली कांग्रेसको १४औं महाधिवेशनअन्तर्गत दोस्रो चरणमा भएको मतदानको मतगणना राति १० बजे देखि हुने भएको छ । अपरान्ह ३ः३० देखि सुरु भएको मतदान ८ बजेसम्म जारी रहने कांग्रेस केन्द्रीय निर्वाचन समितिले जनाएको हाे। राति १० बजेदेखि मतगणना सुरु गरेर आज नै मत परिणाम सार्वजनिक गरिसक्ने बताइएको छ ।

सोमबार भएको निर्वाचनमा सभापति पदका प्रत्यासी कसैको पनि ५१ प्रतिशत मत नपुगेपछि पार्टीको विधान अनुसार सभापतिका लागि पुनःनिर्वाचन भएको हो । पहिलो चरणको मतदानमा प्रधानमन्त्री एवं सभापति देउवाले दुई हजार २५८ र उनका निकटतम प्रतिद्वन्द्वी पार्टीका केन्द्रीय सदस्य डा शेखर कोइरालाले एक हजार ७०२ मत प्राप्त गरेका थिए ।

सभापतिका अन्य प्रत्यासी पूर्वमहामन्त्री प्रकाशमान सिंहले ३७१, उपसभापति बिमलेन्द्र निधिले २५० र केन्द्रीय सदस्य कल्याण गुरूङले २२ मत प्राप्त गरेका थिए । काठमाडौँको राष्ट्रियसभा गृहमा मतदान जारी छ । सभापतिको आज मतगणना गरिने र अन्य पदाधिकारी सहित केन्द्रीय सदस्यको बिहीबारबाट मात्र मतगणना गर्ने निर्वाचन समितिले जनाएको छ ।