काठमाडौँ । नेपाली कांग्रेसको १४ औं महाधिवेशनअन्तर्गत सभापति पदका लागि भएको दोस्रो चरणको मतदान अन्तिम चरणमा पुगेको छ । पार्टीको केन्द्रीय निर्वाचन समितिका अनुसार अहिलेसम्म करिब चार हजार ४०० मत खसेको छ । अब साढे ३०० भन्दा कम मत खस्न बाँकी रहेको निर्वाचन समितिले जनाएको छ ।

राष्ट्रियसभा गृहमा कायम रहेको मतदान केन्द्रमा निर्धारित समयभित्र परिसरभित्र प्रवेश गरिसकेका सबैलाई मतदान गर्न दिइने बताइएको छ । निर्वाचन समितिले अपराह्न ३ः३० देखि साँझ ७ः३० बजेसम्म पुनः मतदान गर्ने गरी निर्वाचन कार्यतालिका प्रकाशन गरेको भए पनि प्राविधिक कारणले मतदानमा केही ढिलाइ भएको हो । कांग्रेसमा कुल ४ हजार ७४३ जना महाधिवेशन प्रतिनिधि भएपनि कम मत खस्ने जनाइएको छ । सोमबार भएको मतदानमा ४६७९ मत खसेको थियो । कांग्रेसको सभापतिका लागि शेरबहादुर देउवा र शेखर कोइराला प्रतिस्पर्धामा छन् ।