काठमाडौं । नेकपा (एमाले) का अध्यक्ष केपी शर्मा ओलीले ज्ञानेन्द्र शाहले माघ १९ को कदम चाल्दा माओवादीका अध्यक्ष पुष्पकमल दाहाल (प्रचण्ड)सँगको सहमतिमा चालेको गम्भिर आरोप लगाएका छन् । एमालेका मनोनित केन्द्रीय सदस्यहरूलाई ललितपुरको च्यासलस्थित तुलसीलाल स्मृति प्रतिष्ठानमा सपथ कार्यक्रमलाई सम्बाेधन गर्ने क्रममा ज्ञानेन्द्रले मच्चाएको उपद्रोमा प्रचण्ड सहमति गरेकाे उनले टिप्पणी गरे ।

‘प्रचण्ड र ज्ञानेन्द्रबीचमा सहमति भएर त्यो उपद्रो भएको थियो, के सहमति भएको थियो, कसकाविरुद्ध सहमति भएको थियो ? त्यो प्रचण्ड र ज्ञानेन्द्रले भन्नुपर्‍यो नि ।’ ओलीले भने ।

१९ माघमा ज्ञानेन्द्रले सत्ता हातमा लिँदै दलहरूमाथि प्रतिबन्ध लगाएर प्रत्यक्ष शासन सुरू गरेका थिए । ओलीले त्यही सहमतिपछि ज्ञानेन्द्रले माओवादीको बिना कुनै अवरोध अभिनन्दन कार्यक्रम गर्न पाएकोले त्यसभित्र ज्ञानेन्द्र र प्रचण्डका बीचमा सहमति रहेको टिप्पणी गरेका हुन् ।

‘ज्ञानेन्द्र र प्रचण्डको त्यही सहमतिपछि अभिनन्दन कार्यक्रम चलाइयो । हामी रुकुम, रोल्पा जान नसक्ने, ज्ञानेन्द्र खुलमखुल्ला जान सक्ने कसरी भयो ? उनले प्रचण्ड र ज्ञानेन्द्रबीच २०६० साल मंसिर १८ गते ५ बुँदे सहमति भएको समेत दाबी गरे । ‘२०६० साल मंसिर १८ गते ज्ञानेन्द्र र प्रचण्डका बीचमा ५ बुँदे सहमति भयो । के सहमति भएको थियो कि ज्ञानेन्द्रले भन्नुपर्यो कि प्रचण्डले भन्नुपर्यो’, ओलीले भने, -‘कसकाविरुद्ध सहमति भएको थियो ? त्यस्ता सहमतिले गर्दा ज्ञानेन्द्रले अभिनन्दन कार्यक्रम चलाए ।’