काठमाडौँ । विवेकशील साझा पार्टीका संयोजक मिलन पाण्डेलाई पार्टीको साधारण सदस्यसमेत नरहने गरी निष्कासनको घोषणा गरिएको छ । मंगलबार बसेको केन्द्रीय कार्यसम्पादन समिति बैठकले पाण्डेलाई पार्टीको सदस्यसमेत नरहने गरी निष्कासन गर्ने निर्णय गरिएको हो ।

बैठकमा अध्यक्ष रवीन्द्र मिश्रले पार्टीलाई गम्भीर क्षति पुर्याउने गरी गतिविधि गरेको भन्दै पाण्डेलाई निष्काशन गरिएको जानकारी गराएका थिए । विवेकशील साझामा अध्यक्ष मिश्र र संयोजक पाण्डेबीच राजनीतिक कार्यदिशालाई लिएर विवाद हुँदै आएको छ । यसअघि मिश्रले पाण्डेलाई स्पष्टीकरण सोधेका थिए । त्यसको जवाफ चित्तबुझ्दो नआएको भन्दै पाण्डेलाई निष्काशन गरिएको उल्लेख छ ।

विवेकशील साझाले पाण्डेलाई लेखेको पत्रमा भनिएको छ, ‘तपाईंले प्रयोग गर्दै आउनुभएको पार्टीको नाम, लेटरहेड, छाप, चुनाव चिह्न तथा पार्टीसँग सम्बन्धित कुनै पनि सामग्री आजैका मितिदेखि प्रयोग नगर्न र गरेमा प्रचलित कानुन बमोजिम कारबाही अघि बढाइने जानकारी गराइन्छ ।’ पाण्डेले समानान्तर समिति घोषणा गरेकाले कारबाही गरिएको विवेकशील साझाले बताएको छ ।