काठमाडौं । नेपाली कांग्रेस प्रदेश नम्बर २ मा आज प्रदेश अधिवेशनअन्तर्गत मतदान हुने भएको छ ।

नेपाली कांग्रेसको १४ औं महाधिवेशन सकिएपछि मात्रै प्रदेश २ मा मतदान हुन लागेको हो । प्रदेश २ मा पनि केन्द्रमा जस्तै तीन प्यानल प्रतिष्पर्धामा रहेका छन् ।

प्रदेश सभापति, उपसभापति, महामन्त्री र एक महिलासहित तीन सहमहामन्त्रीमा सभापति शेरबहादुर देउवा र नेता शेखर कोइराला तथा विमलेन्द्र निधिको संयुक्त प्यानलबीच प्रतिस्पर्धा हुने भएको छ ।

केन्द्रमा सभापति पदमा दोस्रो चरणमा देउवालाई समर्थन गरेका निधि प्रदेश २ मा भने कोइरालासँग मिलेर चुनावमा गएका छन् ।

कोइराला–निधिको समर्थनमा सभापतिका लागि रामसरोज यादवले उम्मेदवारी दर्ता गरेका छन् भने देउवा पक्षबाट रौतहट सभापति कृष्णा यादवले उम्मेदवारी दर्ता गरेका छन्।

रामसरोजको प्यानलबाट उपसभापतिमा धनलाल ठोकर र विनोद खनालले उम्मेदवारी दर्ता गराएका छन् ।

महामन्त्रीमा नरेश यादव र हरेस यादवले उम्मेदवारी दर्ता गराएका छन् भने सहमहामन्त्रीमा अरविन्द अमात्य, विनोद यादवले उम्मेदवारी दिएका छन् ।

यस्तै, सहमहामन्त्रीमा निर्मला सुवेदीले उम्मेदवारी दिएकी छन् ।

कृष्णाको प्यानलबाट उपसभापतिमा वीरेन्द्र सिंह र चन्द्रशेखर यादवले उम्मेदवारी दिए भने महामन्त्रीमा उपेन्द्र यादव र वृहसपति कुमार श्रेष्ठले उम्मेदवारी दर्ता गराएका छन् ।

सहमहामन्त्रीमा जयनारायण यादव र परशुराम चौधरीले उम्मेदवारी दिएका छन् भने रिता यादवले पनि सहमहामन्त्रीमा उम्मेदवारी दर्ता गराएकी छन् ।

झण्डै दुई हजार प्रतिनिधि रहेको २ नम्बर प्रदेशमा जारी अधिवेशनमा देउवा र कोइराला पक्षका केन्द्रीय नेताहरु नै जनकपुरमा रहेका छन् ।