काठमाडौं । नेपाल प्रहरीको केन्द्रीय अनुसन्धान व्यूरो (सीआईबी)ले ललिता निवास जग्गा प्रकरणको मुख्य आरोपीलाई पक्राउ गरेको छ ।

ललिता निवासको जग्गा व्यक्तिको नाममा नामसारी गरेको घटनामा नक्कली सरकारी कागजात तयार पारेको अभियोगमा रामकुमार सुवेदी र उनकी पत्नी माधवीलाई मंगलबार सीआईबीले पक्राउ गरेको हो ।

पक्राउ परेका उनीहरुमाथि अनुसन्धानका लागि हिरासतमा राख्न सीआईबीले सरकारी वकिलको कार्यालयमार्फत काठमाडौं जिल्ला अदालतसँग अनुमति मागेको छ ।

मालपोत कार्यालयमा लेखन्दासको काम गर्ने सुवेदीले शोभाकान्त ढकालसँगको मिलेमतोमा सरकारी स्वामित्वमा आइसकेको ललिता निवासको जग्गा व्यक्तिको नाममा दर्ता गराउन भूमिका खेलेको आरोप छ ।

सुवेदी दम्पत्ति लगायत सरकारी कागजात कीर्ते गरेको आरोपमा छानविन चलिरहेकाले अनुसन्धानका लागि पक्राउ गरिएको ब्यूरोले जनाएको छ ।

सोही प्रकरणका आरोपी शोभाकान्त ढकाल भने विशेष अदालतको आदेशमा थुनामै रहेका छन् ।

सुवेदीविरुद्ध दुई वर्षअघि नै विशेष अदालतमा भ्रष्टाचार मुद्दा दायर भइसकेको छ । मुद्दा दायर भएपछि अदालतमा हाजिर नभई सुवेदी वेपत्ता भएका थिए ।