काठमाडौँ । त्रिभुवन विश्वाविद्यालयको उपप्राध्यापकको परीक्षा सञ्चालनको माग गर्दै सर्वोच्च अदालतमा रिट दायर गरिएको छ । त्रिवि सेवा आयोगले २०७७ फागुन ९ गते दरखास्त आह्वान गरेको उपप्राध्यापक पदको परीक्षा सञ्चालनको माग गर्दै बिहीबार सर्वोच्च अदालतमा रिट दायर गरिएको हो ।

रिट दायर गर्नेमा दरखास्त भरेका परीक्षर्थी रमेश विष्ट र मनिता खत्री रहेका छन् । रिटमा उनीहरुले त्रिवि सेवा आयोगले गत साउन १८ गते सञ्चालन गर्नुपर्ने लिखित परीक्षा स्थगित गरेर करारमा रहेका शिक्षकलाई स्थायी गर्ने गरेको व्यवस्था बदर गर्न माग गरेका छन् । मंसिर १४ गते बसेको त्रिविसभाको बैठकले त्रिविमा स्थायी, अस्थायी वा करार सेवामा अटुट १० वर्ष सेवा गरेका कार्यरत शिक्षकले मात्र प्रतिस्पर्धा गर्न पाउने व्यवस्था गरेको थियो ।

उक्त व्यवस्थाले आफूहरुको प्रतिस्पर्धा गर्न पाउने हक हनन गरेको रिटमा उल्लेख गरिएको छ । रिटमा त्रिवि सभाले गरेको शिक्षक कर्मचारी सेवासम्बन्धी नियम २०५० संशोधन बदर गर्न माग गरिएको छ ।