काठमाडौँ । नेपालले श्रीलंकाविरुद्ध पुनरागमन जीत हात पारेको छ ।
स्पाइकर शान्ति थारु र मिडब्लकर सुनिता खड्काको प्रदर्शनले श्रीलंकाविरुद्ध पुनरागमन जित हात पारेको नेपाली राष्ट्रिय महिला भलिबल टोलीका प्रशिक्षक जगदिश भट्टले बताए ।

बिहीबार बंगलादेशको राजधानी ढाकामा भएको एभीसी एसियन सिनियर महिला तथा पुरुष सेन्ट्रल जोन भलिबल प्रतियोगितामा नेपाल २–० सेटले पछि परेको स्थितिमा पुनरागमन गर्दै श्रीलंकालाई ३–२ को सेटमा पराजित गरेको थियो ।

दक्षिण एसियाली खेलकुदमा पनि श्रीलंकालाई पराजित गरेकाले नेपाललाई जित्नुपर्ने दबाब रहेको मुख्य प्रशिक्षक भट्टले बताए ।

साविक विजेता नेपालले सुरुआती दुई सेट १९–२५ र २१–२५ ले श्रीलंकालाई बुझाएको थियो । अरुणा शाहीको कप्तानीमा रहेको नेपालका लागि तेस्रो सेटमा शान्ति थारू र सुनिता खड्काको राम्रो प्रदर्शनकै कारण त्यसपछिका तीन सेट नेपालले आफ्नो पक्षमा पार्न सफल भएको हो ।

नेपालले तेस्रो सेट २५–१५ जित्दा चौथो सेट समेत २५–१९ले जित्यो भने पाँचौ तथा निर्णायक सेट १५–१३ ले जितेको थियो ।