काठमाडौं । सर्वोच्च अदालतले बन्दी जीवन बिताइरहेका फ्रान्सेली नागरिक चार्ल्स शोभराजलाई थुनामुक्त गर्नु नपर्नाको कारण सरकारसँग मागेको छ ।

शोभराजको बन्दी प्रत्यक्षीकरण मुद्दामा बिहीबार सुनुवाई गर्दै न्यायाधीश अनिल कुमार सिन्हाको एकल इजलासले सरकारसँग तीन दिनभित्र जवाफ दिन माग गरेको हो ।

सर्वोच्चले शोभराजलाई ज्येष्ठ नागरिकले पाउने सुविधा पाउनुपर्ने हो कि होइन भनी लिखित जवाफ पेस गर्न आदेश दिएको हो ।

थुनामुक्त गर्नु नपर्ने कुनै कारण भए महान्यायाधिवक्ताको कार्यालय मार्फत् आदेश प्राप्त भएको मितिले बाटाका म्याद बाहेक तीन दिनभित्र जवाफ पेस गर्न अदालतले सरकारलाई आदेश दिएको छ ।

आफ्नो कैद अवधि भुक्तान भइसकेको दावीसहित दायर गरिएको बन्दी प्रत्यक्षीकरणको रिट निवेदनमा उक्त आदेश भएको हो । रिट निवेदनमा ज्येष्ठ नागरिकले पाउनुपर्ने सुविधाअनुसार आफूले कैद भुक्तान गरिसकेको उल्लेख छ ।

अदालतले तोकेको सजाय आफूले भोगिसकेको भन्दै शोभराजले थुनामुक्त हुनुपर्ने मागसहित सर्वोच्च अदालतमा पुस ७ गते बन्दी प्रत्यक्षीकरणको रिट दायर गरेका थिए ।