काठमाडौं । विश्व फुटबलको सर्वोच्च निकाय फिफाको नयाँ वरीयतामा नेपाल यथावत स्थानमा रहेको छ । फिफाले बिहीबार सार्वजनिक गरेको नयाँ वरीयता अनुसार नेपाल १६९ औं स्थानमै रहेको हो । अघिल्लो महिनाको वरीयतामा पनि नेपाल १६९ औं स्थानमा थियो ।

नेपाल दक्षिण एसियाली राष्ट्रको वरीयतामा भारत १०४ औं स्थानमा रहेको छ भने माल्दिभ्स १५७ औँ स्थानमा छन् ।

नेपालभन्दा पछि रहेको भुटानले एक स्थान सुधार गर्दै १८५ औं स्थान बनाएको छ भने बंगलादेशले पनि एक स्थान सुधार गरी १८६ औं स्थान बनाएको छ ।

यसैगरी, पाकिस्तान १९८ औं स्थानमा रहँदा श्रीलंका २०४ औं स्थानमा कायम रहेको छ ।

एसियाली राष्ट्रको वरियतामा इरान शीर्ष स्थानमा कायमै रहँदा जापान दोस्रो, दक्षिण कोरिया तेस्रो, अष्ट्रेलिया चौथो र २ स्थान सुधार गरेको कतार पाँचौ स्थानमा छन् ।

नयाँ विश्व वरीयतामा बेल्जियम शीर्षस्थानमा यथावत छ ।

यस्तै, ब्राजिल दोस्रो तथा फ्रान्स तेस्रो स्थानमा रहँदा इंल्यान्ड चौथो स्थानमा छ ।

पाँचौँमा अर्जेन्टिना, छैंठौंमा इटाली छन् भने स्पेन सातौं, पोर्चुगल आठौं, डेनमार्क नवौं र नेदरल्यान्ड्सले दशौं स्थान कायम गरेको छ ।