काठमाडौं । संस्कृति, पर्यटन तथा नागरिक उड्डयन मन्त्री प्रेम आले र पर्यटन बोर्डका अध्यक्षबीच ठूलो मनमुटाव रहेको खुलासा भएको छ । पर्यटन बोर्डको स्थापना दिवसका अवसरमा शुक्रबार बोर्डमा आयोजित कार्यक्रममा बोल्दै मन्त्री आलेले सीईओप्रति तथानाम गाली गरेका छन् ।

मन्त्री आलेले पर्यटन बोर्डका सीईओ धनञ्जय रेग्मीलाई ‘साँढे’को आरोप लगाए । कार्यक्रममा बोल्दै मन्त्री आलेले सिइओप्रति रेग्मीप्रति लक्षित गर्दै साँढेलाई पालेर बोर्ड नचल्ने बताए ।

‘धेरै रिसाउनुभो जाम् रक्सी खान भन्ने साँढेलाई राखेर बोर्ड चल्छ ?’ मन्त्री आलेको प्रश्न थियो । पर्यटन बोर्डमा धनञ्जय रेग्मी सीइओ रहेसम्म बोर्डको प्रगति नहुने उनले दाबी गरे ।

मन्त्री आलेले इमान बेचेर मन्त्रीको कुर्सीमा नबस्ने बताए । उनले हाल छानबिनका क्रममा रहेका बोर्डका सिईओ धनञ्जय रेग्मीले टोयोटाका गाडी बेचेर आफ्नो इमान किन्न खोजेको भन्दै आक्रोश व्यक्त गरे ।

मन्त्री आलेले आफ्नो मन्त्रालय अन्तरगतका संघसंस्थाहरुमा विकृतिहरुको चाङ भएकोले सम्हाल्नै गाह्रो भइरहेको बताए । उनले पहिला काले काले मिलेर भाले खाए पनि अब प्रेम आले आएकोले भ्रष्टाचार हुन नदिने बताए ।

मन्त्री आलेले डब्लूटिएमको कार्यक्रममा जाँदा बोर्डबाट ८० लाख खर्च भएको भन्ने सुनेको भन्दै त्यसको छानबिन गर्न माग गरे । उनले सबै खाने खर्च आफूले व्यहोरेकाले खर्चको बारेमा छानबिन गरेर कारबाही गर्नुपर्ने बताए ।

मन्त्री आलेले आफूलाई जबर्जस्ती लण्डन लगेर अपमानित गरेको समेत गुनासो गरे । लन्डनमा पुगेर आफू बोल्न नपाएको समेत उनले गुनासो गरे ।

सर्वोच्च अदालतले बुधबार मात्रै नेपाल पर्यटन बोर्डका प्रमुख कार्यकारी अधिकृत रेग्मीलाई निलम्बनको निर्णय तत्काल कार्यान्वयन नगर्न अन्तरकालीन आदेश जारी गरेको छ ।

पुस २ गते संस्कृति, पर्यटन तथा नागरिक उड्डयन मन्त्रालयका सचिव महेश्वर न्यौपानेको अध्यक्षतामा बसेको पर्यटन बोर्ड सञ्चालक समितिको बैठकले सीईओ रेग्मीलाई निलम्बन गर्ने निर्णय गरेको थियो ।