काठमाडौं । विवेकशील साझा पार्टीका अध्यक्ष रबीन्द्र मिश्र राष्ट्रिय प्रजातन्त्र पार्टी राप्रपासँग नजिकिएका छन् । वैकल्पिक धारको युवाहरुको पार्टी विवेकशीलसँग पार्टी एकता गरी नेतृत्व लिएका मिश्र राप्रपासँग पार्टी एकता गर्ने पहल स्वरुप छलफल थालेका छन् ।

शुक्रबार विहान राप्रपा अध्यक्ष राजेन्द्र लिङ्देन र महामन्त्री धवलशमशेर राणासँग उनले पार्टी एकताका बारेमा छलफल गरेका छन् । लिङदेन र राणासँगको छलफलपछि मिश्रले भेटको फोटो आफ्नो ट्वीटरमा पोष्ट गरेका छन् ।

राप्र्रपा अध्यक्ष लिङदेन र महामन्त्री राणसँग राजनीति, समाज र देशको भविष्यबारे आशाजनक संवाद भएको मिश्रले बताएका छन् ।

सो क्रममा मिश्रले आफूले लेखेको किताव ‘राजनीतिसँगै राजकाज’ दुवै नेतालाई हस्तान्तरण गरेका थिए ।

‘राप्रपाका नवनिर्वाचित अध्यक्ष राजेन्द्र लिङदेन तथा महामन्त्री धवलशमशेरराणासँग राजनीति, समाज र यो देशको भविष्यबारे चिन्तापूर्ण तथा आशाजनक संवाद भयो । दुवैप्रति आभारी छु ।’– मिश्रले ट्वीट गरेका छन् ।

पछिल्लो समय विवेकशील साझा पार्टीका अध्यक्ष मिश्रले विचार भन्दामाथि देश भन्दै संघीयताको खारेजी र धर्मनिरपेक्षताबारे जनमत संग्रहको प्रस्तावअघि सारेपछि सो पार्टीमा आन्तरिक विवाद चुलिएको छ । त्यसको काउन्टर गर्दै साविक विवेकशील पक्षका चार जनाले छुट्टै दस्तावेज सार्वजनिक गरेका थिए । विवाद चुलिँदै जाँदा मिश्रले विवेकशील साझाका संयोजक मिलन पाण्डेसहित विवेकशीलका संस्थापक युवाहरुलाई कारबाही गरेका छन् ।

मिश्रको पछिल्लो अवधारणाले राप्रपालाई मिश्रसँग नजिकाएको हो । राप्रपाले हिन्दु राष्ट्र र राजसंस्थाको अकालत गर्दै आएको छ भने मिश्रले राजसंस्थाको पक्षमा सार्वजनिक अभिब्यक्ति दिँदै आएका छन् ।

राप्रपा महामन्त्री राणाकाअनुसार, मिश्रले आफूहरुसँग पार्टी एकताकाबारेमा छलफल गरेका छन् ।

समान विचार भएका पार्टीहरूबीच एकता गर्नका लागि राप्रपाले राणाको नेतृत्वमा समिति गठन गरेको छ । त्यसले विभिन्न पार्टीहरूसँग एकताका लागि वार्ता गरिरहेको छ ।

एकता महाधिवेशनबाट अध्यक्ष निर्वाचित भएपछि लिङ्देनले राप्रपाको पहिलो बैठकमै समान विचार भएका शक्तिहरूसँग एकता गर्न राणाको संयोजकत्वमा वार्ता समिति गठन गरेका थिए ।

यो पनि पढ्नुस्ः

रबीन्द्र मिश्रको ‘इन्ट्री’ ले विवेकशील समूह तितरबितर