काठमाडौं । प्रतिनिधिसभाको बैठक आज पुनः बस्दैछ । दशौं अधिवेशनअन्तर्गत संसद भवन नयाँ बानेश्वरमा दिउसो १ बजे बस्ने बैठकमा प्रधानमन्त्री शेरबहादुर देउवाले थारू आयोगको तेस्रो वार्षिक प्रतिवेदन आर्थिक वर्ष २०७७÷७८ पेश गर्ने कार्यसूची रहेको छ ।

त्यसअघि बिहान साढे ११ बजे कार्यव्यवस्था परामर्श समितिको बैठक बोलाइएको छ । संसद भवनको शंकर हलमा बस्ने परामर्श समितिको बैठकमा संसदको अवरोध हटाउन पहल हुने सभामुख अग्निप्रसाद सापकोटाका प्रेस संयोजक श्रीधर न्यौपानेले जानकारी दिए ।

प्रमुख प्रतिपक्षी दल नेकपा एमालेले भने आफ्नो माग सम्बोेधन नभएकाले संसद अवरोध जारी रहने अडान कायमै राखेको छ ।
एमालेले संसदको नवौं अधिवेशनदेखि नै संसद बैठक अबरुद्ध गर्दै आएको छ । प्रतिपक्ष दलका सांसदहरुको अवरोधकावीच सभामुख सापकोटाले संसदका कामकारवाही अगाडि बढाउँदै आएका छन् ।

एमालेले पार्टीले कारवाही गरेको माधव नेपाललगायतका १४ जना सांसदको पद खारेज गरेको सूचना नटाँसेको भन्दै निरन्तर संसदमा नाराबाजी र विरोध गर्दै आएको छ ।