काठमाडौं । राष्ट्रिय सभा सदस्यको निर्वाचनमा भागबण्डा मिलाउन सत्ता गठबन्धनको बैठक बस्दैछ ।

राष्ट्रिय सभा सदस्यको निर्वाचनमा उम्मेदवार छान्नका लागि सोमवार विहान सत्ता गठबन्धनको बैठक बस्न लागेको हो ।

केही समय यता सत्ता गठबन्धनको बैठक बस्न सकेको थिएन । सत्ता गठबन्धनमा नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी (जसपा), राष्ट्रिय जनमोर्चा रहेका छन् ।

यसअघि मंसिर ४ गते सत्ता गठबन्धनका दलसहित संसदमा प्रतिनिधित्व गर्ने दलहरुको सर्वदलीय बैठक बसेको थियो । तर उक्त छलफलमा प्रमुख प्रतिपक्षी दल नेकपा एमाले भने अनुपस्थित रहेको थियो ।

आगामी फागुनदेखि २० सांसदको चार वर्षे कार्यकाल पूरा हुँदैछ । कार्यकाल पूरा गरेका राष्ट्रियसभाका २० सदस्यका लागि आगामी माघ १२ गते मतदान हुँदैछ ।

नेकपा (एमाले)बाट आठजना, माओवादी केन्द्रबाट चार, एकीकृत समाजवादीबाट चार, काँग्रेसबाट तीन र मनोनीत एकजना सांसद बिदा हुने क्रममा छन् ।

राष्ट्रपतिबाट मनोनीत हुने एक स्थानबाहेक १९ सिटका लागि माघ १२ गते बिहान ९ बजेदेखि दिउँसो ३ बजेसम्म ७ वटै प्रदेशमा चुनाव हुँदैछ ।